2014年11月10日 星期一

古文粵譯:詩經 (衛風)氓

這是家父70多年前讀卜卜齋的課本
古文粵譯: 詩經 (衛風) 氓

氓之蚩蚩,抱布貿絲。匪來貿絲,來即我謀。
老土鄉下仔,攬住匹布(*)來同我交換絲。你唔係來換絲,想追求我啫。(*也可以泛指「拎住錢」,以前布帛亦屬貨幣)

送子涉淇,至於頓丘。匪我愆期,子無良媒。
我送你過淇水,去到頓丘。同你講:唔係我特登拖延,皆因你未搵到媒人。

將子無怒,秋以為期。乘彼垝垣,以望複關。
你唔好嬲我,不如我地就決定今年秋天啦。我爬上高牆,望住你住嘅復關個邊。

不見關,泣涕漣漣。既見關,載笑載言。
望唔見復關,我流晒眼淚。望得見復關,開心到笑出來。

爾卜爾筮,體無咎言。以爾車來,以我賄遷。
你去搵算命先生問下,有無咩阻滯。無就到時駛輛車過來,我會搬嫁妝上車


桑之未落,其葉沃若。于嗟鳩兮!無食桑葚。
桑樹未落葉個陣,桑葉綠油油。鳩鵲都識揀來食,唔會要老殘嘅桑葚。

于嗟女兮!無與士耽。士之耽兮,猶可說也。
唉,做女人嘅,真係唔好咁多情。男人到處留情,一般人覺得好閒。

女之耽兮,不可說也。桑之落矣,其黃而隕。
女人有咩行差踏錯,真係有排衰呀。好比樹上跌下嘅桑葉,又黃又爛。

自我徂爾,三歲食貧。淇水湯湯,漸車帷裳。
我嫁咗俾你三年,無好日子過。淇河水勢浩大,浸濕輛車子嘅帷帳。

女也不爽,士貳其行。士也罔極,二三其德。
有時女人並無差錯,只係男人行為前後不一致。男人立心不良,對愛情唔得專一。

三歲為婦,靡室勞矣。夙興夜寐,靡有朝矣 。
做了你老婆三年,家務勞苦。早起晚睡,唔係一日半日嘅事。

言既遂矣,至於暴矣。兄弟不知,咥其笑矣。
你有咗我個人之後,竟然變得對我粗暴。我家中兄弟唔知內情,仲我被你糟質。

靜言思之,躬自悼矣。及爾偕老,老使我怨。
靜靜地思前想後,只能暗自悲傷。講咩白頭偕老,一諗起年老色衰,我更加閉翳。

淇則有岸,隰則有泮。總角之宴,言笑晏晏,
淇水旁邊有高地,低濕之地有邊涯。以前年輕男女一齊係個度玩,言談笑語幾咁開心。

信誓旦旦,不思其反。反是不思,亦已焉哉!
個陣時你誓神劈願話點樣愛我,而家你都忘記晒!你既然講過嘅嘢都當無件事,我哋玩完咯

。。。。。。。。。。。。。。。。。。。

10 則留言:

  1. 子曰:「詩三百 ,一言以蔽之,曰:『思無邪』。」

    二千五百年後,中國某地區出了位思歪。地區蟻民摘錄《詩經 (衛風) 氓》贈思歪:

    氓之蚩蚩,抱布貿絲。匪來貿絲,來即我謀。〈拎住摺凳和拍子簿〉

    爾蔔爾筮,體無咎言。以爾車來,以我賄遷。〈揭發有人僭建,無哂阻滯〉

    桑之未落,其葉沃若。于嗟鳩兮!無食桑葚。〈選舉是君子之爭,不會抹黑他人〉

    女之耽兮,不可說也。桑之落矣,其黃而隕。〈一個唔知有冇一百磅嘅靚仔被指襲警,受害者是一班手瓜起𦟌的公安〉

    自我徂爾,三歲食貧。淇水湯湯,漸車帷裳。〈三年來,就快被樓價的升勢浸死〉

    女也不爽,士貳其行。士也罔極,二三其德。〈班蟻民做錯乜嘢〉

    三歲為婦,靡室勞矣。夙興夜寐,靡有朝矣 。〈三年來,日日早出晚歸,一個月揾唔夠萬四蚊〉

    言既遂矣,至於暴矣。兄弟不知,咥其笑矣。〈又胡椒噴霧,又催淚彈,但人地話我用保鮮紙攻擊你〉

    靜言思之,躬自悼矣。及爾偕老,老使我怨。〈有時諗下,嚟緊呢三年,甚至八年,唔知點捱〉

    淇則有岸,隰則有泮。總角之宴,言笑晏晏,〈以前在深水埗舊樓天台,同你傾得好開心〉

    信誓旦旦,不思其反。反是不思,亦已焉哉!〈攞番份政綱出嚟睇,你好似變咗第個人〉

    回覆刪除
  2. 封建時代, 男尊女卑, 寫有爭議性嘅題材, 作者都好夠勇氣.

    回覆刪除
    回覆
    1. 男尊女卑 -- I think it was much worse since Song Dynasty, but less so before.

      刪除
    2. 其實,那時非常開放。

      即使到了唐朝,仕女穿的衣服,有近乎全露胸者!

      刪除
    3. 一到宋朝,開倒車。

      刪除
  3. 梁 Sir,有一留言好似唔見咗,可否 check check,謝。

    回覆刪除
    回覆
    1. 找回,排頭位!
      老兄解詩經,勁過大小毛公。

      刪除
  4. 謝梁 Sir 粵譯推介,唔怪得之孔子推崇備至,《詩經》文字言簡意賅,生動活潑,點解中文幾千年下來,不但沒有進化,反而退了好多步,《詩經》泊埋又長又尋的白話文,高下立見。

    回覆刪除
    回覆
    1. 詩經裏的「衛風」和「鄭風」,特別多露骨的情詩,孔夫子也說「淫」,要「放鄭聲」,好在沒全部刪去。
      後世解詩經的人,為了補鑊,就生安白做,說這些詩歌,這首那首詩,其實寫來諷刺什麼政事失德的,牽強附會之至。

      刪除
    2. 謝梁 Sir 解釋,學到唔少嘢。

      刪除