2014年9月28日 星期日

古文粵譯:祭鱷魚文

祭鱷魚文 (韓愈 )


維年月日,潮州刺史韓愈,使軍事衙推奏濟,以羊一豬一,投惡谿之潭水,以與鱷魚食,而告之曰: 
某年某月某日,潮州刺史(地方官)韓愈,指派軍頭秦濟,將一隻羊、一隻豬,掟落惡溪江水中,俾班鱷魚食,而家有野同你講:

「昔先王既有天下,烈山澤,罔繩擉刃,以除蟲蛇惡物,為民害者,驅而出之四海之外。及後王德薄,不能遠有,則江漢之閒,尚皆棄之,以與蠻夷楚越,況潮嶺海之閒,去京師萬里哉?鱷魚之涵淹卵育於此,亦固其所。
係N年前,先王得左天下,治理山川湖泊,將D為害百姓既蛇蟲猛獸,通通驅趕出境。後來的君王德行差D,國家直接管轄的區域縮晒水,長江、漢水一帶都被少數民族佔左,潮州係南嶺之外、南海之濱、距京城成萬里,更加管唔到咯!咁情況下,你們鱷魚出沒係潮州一帶,生育在水澤之中,尚屬情有可原......


今天子嗣唐位,神聖慈武。四海之外,六合之內,皆撫而有之。況禹跡所揜,揚州之近地,刺史縣令之所治,出貢賦以供天地宗廟百神之祀之壤者哉?
當今大唐天子繼承皇位,英明神武,威嚴仁慈,朝廷早已恢復對各地管轄權,安定繁榮唔在講。呢一笪地方,係大禹到過既,原先係揚州管轄,朝廷早就派左州、縣官員來管治。呢度正式向朝廷納稅、四時祭祀百神,一片王土,點能容許你班畜牲搞搞震?

鱷魚!其不可與刺史雜處此土也!刺史受天子命,守此土,治此民。而鱷魚睅然不安谿潭,據處食民畜,熊豕鹿獐,以肥其身,以種其子孫;與刺史抗拒,爭為長雄。
你班野,同我聽住:你哋同本官,無可能同時住埋一笪地方。本官秉承天子之命,來到潮州鎮守疆土、管治百姓,你地呢班突眼怪、不知好歹的鱷魚,唔老老實實匿埋係溪河水潭之中,而係四處逞兇殘害人畜,只為食肥自己同繁愆後代。你地竟敢剃本官眼眉,想與本官鍊下咁話。

刺史雖駑弱,亦安肯為鱷魚低首下心。伈伈睍睍,為民吏羞,以偷活於此耶?且承天子命以來為吏,固其勢不得不與鱷魚辨。
本官即使唔算好勁,都唔會衰係你地手上,我唔會對你地隻眼開隻眼閉。如果任由你地繼續作惡,我以後仲駛出來行咩!本官是皇帝派落來管理呢笪地方既,一定要向你班野講清講楚。

鱷魚有知,其聽刺史言!潮之州,大海在其南。鯨鵬之大,蝦蟹之細,無不容歸,以生以食,鱷魚朝發而夕至也。今與鱷魚約:盡三日,其率醜類南徙於海,以避天子之命吏!
拿!如果你地係識聽既,聽清楚本官既說話:潮州南面就是大海,個度大到無倫,咩野大小海洋生物都夠晒住,你地朝早由潮州出發,晚黑就可以到。現在我同你地約定:以三日為期,盡快帶埋班騎呢怪,游去南邊的大海,係我呢個朝廷派來的官員面前消失。

三日不能,至五日;五日不能,至七日;七日不能,是終不肯徙也;是不有刺史,聽從其言也;不然,則是鱷魚冥頑不靈,刺史雖有言,不聞不知也。
如果三日時間不夠,就五日;五日仲不夠,至多俾夠你地七日;七日之後仲未走清,咁即係賴死唔走啦。我既金石良言,你就當我狗up;直情唔聽,當我流既啫。

夫傲天子之命吏,不聽其言,不徙以避之,與冥頑不靈而為民物害者,皆可殺。
藐視天子派來既官員,唔聽從勸告,肯遷徙迴避,冥頑不靈為害百姓,都係抵死有餘。

刺史則選材技吏民,操強弓毒矢,以與鱷魚從事,必盡殺乃止。其無悔!」
本官會挑選呢處有本事既人,使用強弓毒箭圍剿你地,一於殺晒你地先會停手,到時你地咪後悔!






8 則留言:

  1. 古時潮州有鱷魚,宜家去咗邊?

    回覆刪除
  2. 今時應該嚟咗香港,呌LACOSTE (左口鱷) 唔係好多,一堆啫,仲唔夠你玩,聴講佢哋都喺中環出沒,所以佢哋好怕人佔中, 你懂的!

    回覆刪除
  3. 學生湧上街頭 , 鱷魚也要逃亡 !

    回覆刪除

  4. 韓愈《祭鱷魚文》是真的講鱷魚,還是以物諷人。

    回覆刪除
  5. 好文章跟好電影一樣,應該每次睇都有唔同嘅啟示,睇嘅環境時間唔同當然感受就不一樣,今天大家都會有感而發,尤其是我們移居海外的香港人!

    回覆刪除
  6. 出動催淚彈了 , 香港人會同你死過 !

    回覆刪除
  7. 睇香港,唔使催涙彈都流眼淚,一意孤行,政策傾邪,左口魚,左口鱷當道,只有在心㡳里撐。

    回覆刪除
  8. 學生罷課,老師罷教,市民大眾應該罷就。
    Chris, 你好似罷工喎!

    回覆刪除